Afaq-Iqbal Series Mutala-e-Islam – 7

Description

Aafaq Islamiat (Iqbal Series) Qaumi Taleemi Policy 2020 ki sifarishaat aur jadeed taqazon ke ain mutabiq murattab ki gayi hai. Is series mein talaba ki amali zindagi ko mad-e-nazar rakhte hue nihayat ahem tasawwuraat (Wahdaniyat, Risalat, bil-khusoos Aqeeda-e-Khatm-e-Nabuwwat, Ibadat-o-Muamalat aur Asr-e-Hazir ke jadeed taqazon) ko Quran-o-Sunnat ki roshni mein mukammal hawala jaat ke saath mukhtasar, jaame, marboot aur mudallal andaaz mein pesh karne ki hatta-ul-imkaan koshish ki gayi hai. Yeh series talaba ko baamal aur baashaoor Musalman banne mein madadgar sabit hogi. (InshaAllah) Numaya Khususiyaat: Sabaq mein aasaan se mushkil aur maloom se namaloom ki taraf safar tay karne ka usool apnaya gaya hai. Behtar aur moassar tadrees ke liye sabaq ke aaghaz mein maqasid aur asatiza-e-kiram ke liye tafseeli hidayaat maujood hain. Islami aqaaid, tasawwuraat aur deegar mauzuaat ke fahm ke liye bachon ki zehni satah ke mutabiq mazahir-e-qudrat se misaalein shamil ki gayi hain. Allah Ta’ala se mohabbat, shukar aur Rasool Allah ﷺ ki mohabbat ke jazbe ki aabiyaari karne ki koshish ki gayi hai. Nez, talaba ko Sunnat-o-Hadees-e-Nabawi ﷺ aur Seerat-e-Sahaba par amal paira hone ki targheeb di gayi hai. Rozmarrah mamoolaat mein parhi jane wali mukhtasar duaein tarjume ke saath shamil ki gayi hain, taake ibtida-e-bachpan hi se yeh duaein talaba ki aadat ka hissa ban sakein. Tasawwuraat ki tafheem ki jaanch aur i'aade ke liye aasaan mashqi sawalat shamil kiye gaye hain. Nez, nisab ki tajweez kardah sargarmiyon ke saath saath deegar dilchasp sargarmiyan bhi kitab mein shamil hain. Series mein matn aur sargarmiyon ke zariye talaba ki zehni-o-jismani, fikri-o-amali, maashi-o-muashrati aur akhlaqi-o-mazhabi zarooriyaat poori karne ki sa'i ki gayi hai. Insani jaan-o-maal aur izzat ke ehtram aur hifazat ki targheeb ke saath saath haasil ki gayi maloomat ka amali zindagi mein istemal bhi sikhaya gaya hai. Bachon ki aasani ke liye ahem istilahaat, maqamaat aur naamon ki durust adaigi ke liye a'raab ka istemal kiya gaya hai. Tasawwuraat ki moassar tadrees aur talaba ki dilchaspi ke pesh-e-nazar naqshon ka istemal kiya gaya hai. Kitab ke aakhir mein matn mein shamil mushkil alfaaz aur istilahaat ke ma'ani farhang mein diye gaye hain.