Afaq Iqbal Series Urdu Doam

Description

Aafaq Iqbal Series pre-primary aur primary darjon ki darsi kitabon par mushtamil hai. Yeh series Qaumi Nisab 2020 ki sifarishaat aur jadeed taqazon ke ain mutabiq murattab ki gayi hai. Is series ka maqsad bachon mein Urdu zaban ki maharatein paida karna hai, taake bachay sahi Urdu bol, parh aur likh sakein. Lawazme ke intikhab aur sargarmiyon ke zariye bachon ki lisani, takhleeqi, istehsani, tajziyati, mushahadati aur tanqeedi salahiyaton ko parwan charhane ki koshish ki gayi hai. Saath hi Islami usoolon ki roshni mein bachon ki kirdar sazi bhi Aafaq Urdu Series ki kitabon ka khaas pehlu hai. **Numaya Khususiyaat:** - Bachon ke akhlaq-o-kirdar ki tarbiyat aur unhein muashray ka ek fa'aal shehri banane ke liye khaas taleemi lawazma shamil kiya gaya hai. - Zakhira-e-alfaz aur maloomat ki peshkash mein bachon ki umar aur darjay ka khaas khayal rakha gaya hai. Mazeed yeh ke miyaari, khoobsurat aur dilkash tasveeron ko kitabon ka hissa banaya gaya hai. - Asatiza-e-kiram ki mukammal rehnumai ke liye tadreesi maqasid aur rehnuma nuqaat faraham kiye gaye hain. - Kitabon mein shamil sawalat maloomati, tafheemi, itlaaqi aur takhleeqi noiyat ke hain. In ki tashkeel mein Bloom's Taxonomy ke tamam darajaat ko pesh-e-nazar rakha gaya hai. - Amali sargarmiyon ke zariye bol-chaal ki tarbiyat ka khaas ehtimam kiya gaya hai, taake bachay apne khayalat aur maqsad-e-guftagu ko behtar andaaz mein bayan kar sakein. - Bachon ki takhleeqi salahiyaton ko ujagar karne, mantiqi soch ko farogh dene, tanqeedi nuqta-e-nazar ko parwan charhane aur quwwat-e-mutakhayyila ko mazboot banane ke liye mukhtalif sargarmiyan shamil ki gayi hain. - Lisani tasawwuraat ki tadrees ke liye maqroos se mujarrad ke usoolon ki pairwi ki gayi hai.